Iqaluktutiaak
Iqaluktuuttiaq nunaqatigiinnguqtinnagu, nuna nayuqtangillu Iqaluktuuttiarmiuttauyut taiyauvagaat, numiktauyuq imaa taidjutilik ‘nuna amihunit iqalulik’ Inuinnaqtun uqauhianut[1]. Iqalukhiuqpaktut, huli aulayuittunilu, niqituanguuvakhunilu inuuhivut. Inuinnait qangaraaluk nayuqpakhimayangit haniani Iqaluktuuttiami qauyimayauvagaat Iqaluktuurmiut, taimaa parnautigivakhugillu ukiumi iqalukpiit iqalliqinaqhigaangat nunanganit. Imaruqtirviani, iqalukpiit hituliqpaktut taununga Ukiuqtaqtum Taryunganit, ukiivakhutik auyami niriblutik puvallaqhuqhutiglu. Kinguani Niqiliqivingmi, iqalukpiit mayuliqpakhutik kuukkami imatqikpiaqtumi nayugaanit ukiivlutik.
Pitquhirnut Iqalukhiurniq[ᓱᖁᓯᖅᐹ ᐃᓚ | edit source]
Taimani, angayuqaavut parnautiqaqpaktut aallatqiit ingilrutinit iqalukhiurutikhamaat. Iqalukhiuliqpakhutik iqalukpiit ihuurniglu ‘aulattivlutik’, qaayurnaqhiliraangallu tatqiqhiutimi hikuhimayut tattiit. Uipkuaqaqhutik pilraqhimayut ivalunit atuqhutik nivingayumik mikkirunmik, kannuyarmik qaryuqhautilingnik uvani aayurarmi tuuqhimayumilluunniit aglu hikumi. Una uipkuaq numiqtutut ittuuvlutik mikkirarnirumik akturnaqtumik, taimaa qilamiuqtumik amuraqtaulaaqtangit iqaluk. Uugat aulattitiyauvaktut taimaattauq taryum hikuani. Ilangani, nanup kigutaa nivingayutut aulattitivakhutik iluan imap uugaqhiuqtumik takiyaaqtumik kakivangnit kapinahuarlugu iqaluk qanittaraangat.
Auyannguraangat, Inuinnait haputiliuqpakhutik, nutqarunmi uyaqqanit kuukkani iqalungnut huvaqaliraangat. Hapkuat haputit imaq ikaaliqpaktut kihimi iqalut nutqaqpaktut, amigaitpiaqtut iqalukpiit ayuqhitpakhutik uyaqqanut taimaa kapuqtauvaktut algangnulluunniit tiguliqpaktut.
Pinniqpiaqtumik hanayauliqpaktut kakivainnit iqalukhiurvikhat. Hapkuat kakivait takiyaaqtumik tigummiviqaqhutik kingualu qanuq ilingayut pingahulingnit kapurviqaqhutik. Kapurviit malrurnik, ilaani pingahunit nuvuqaqhutik, ipikpiaqtuk malruk, kannuyarnik nuvuqaqhutik katihimayuq hilataani nuvulingnit hanahimayunit ipikpiaqtut kapinnaqtut kapilaaqtangit iqaluk. Iqaluk kaput takiyaaqtunik, havigalingnit qaryuit atuqtauvaktullu qalurarlugit iqaluk amigailiraangat huvalingnit kuukkami haputini.
Iqalliqiliraangat[ᓱᖁᓯᖅᐹ ᐃᓚ | edit source]
Iqalliqiliraangat amihuuyut ukiakhami huqarnaqhiliraangat ikayuutauvaktut taimaa niqikhautikhangit ilagiiktunut qaaruyurnaqhiliraangat ukiumi. Hamna tautungnaqtuq hivuani naunaitturli qanuq aallatqiit pitquhirnit iqalliqiliqpaktut qangaraalungmi. Iqalut piffiliugait paniqhiqpaktangit takiyaaqtumik akhunaak qiliqhimayuk uyararnit. Paniraangat, iqaluk tutquqtiqpakhugit piruvlugit uyaqqanit niqikhamaat. Piruhimattiaqtut taimaa huraat niqikhaqhiuqtut pittailivlugit piruttiaqtauvagaat Inuit aikhirnialiraangat. Iqalut niaquat papirungillu puriqhugit iluani takiyaaqtumut uyaqqat iggavingit, ingniuqhugit kikhungni. Iqaluit niriyauliqpagaat igahimaittumik qirniilluunniit.
Ublumi Iqalukhiurniq[ᓱᖁᓯᖅᐹ ᐃᓚ | edit source]
Amihut angayuqqaavut pitquhingit iqalukhiuraangat ukpiruhuutingit nayugaangillu huli aulayuittut ublumi. Inuinnait aallamik ingilrutiqaliramit, haffuminngatut kuvyiit iqqaqhautinillu, taimaa iqalliqiliraangamik ilaita iqalukhait. Iqalukhiurniq Iqalukpiit taimaa maniliurahuaqpakhutiktauq. Ikittumik iqalukhiurnikkut iqalukhiuqtut havaktaulihaaqhimayut Iqaluktuuttiami 1960 miqaak, uvanittauq qanilrukkut 1990 nulihaaqtumi Kitikmeot Niqit havakhiuqpakhutik iqalukhiutit iqalukhiurnaqhigaangat niuviqtittivlutik ahinut hilaryuamilu niuvirumayunut. Nunaqatigiiktumi havaktut ukiami iqalukhiuqtunut upingivaktut pulaaqtaqtunut hilaryuaq ilauqatauyumayunut, taimaa ikayuliqpakhugittauq, hulidjuhianit taimaa angayuqaavut aturaaqhimagaluaqtangit qangaraalungmi.
Kiuqattautiniit[ᓱᖁᓯᖅᐹ ᐃᓚ | edit source]
- ↑ IsumaTV 6 Short Programs from Cambridge Bay - https://web.archive.org/web/20160306012754/http://www.isuma.tv/ibc/6-short-programs-from-cambridge-bay