ᓵᒻ ᑮ ᐃᒡᓗ
ᓵᒻ ᑭ ᐃᒡᓗᕐᔪᐊᖅ (ᓴᐃᓂᓯᑎᑐᑦ: 三記號大樓), ᖃᐅᔨᒪᔭᐅᖕᒥᔪᖅ ᔮᒃ ᓵ ᓇᓪᓕᐅᒃᑯᒫᓕᕆᔨᒃᑯᑦ ᐃᒡᓗᕐᔪᐊᖓ, ᒪᕐᕉᖕᓂᒃ ᖁᓕᕇᓕᒃ ᓂᐅᕕᕐᕕᒃ ᐃᒡᓗᕐᔪᐊᖅ ᕚᓐᑰᕙᒥ, ᐳᕆᑎᔅ ᑲᓚᒻᐱᐊᒥ, ᑲᓇᑕᒥ, ᖃᓂᒋᔮᓂ ᐃᓯᕐᕕᖓᑕ ᓄᓇᓕᐸᐅᔭᐅᑉ ᓴᐃᓇᑕᓐ. ᖃᐅᔨᒪᔭᐅᔪᖅ ᒥᑭᑦᑐᑯᓘᓂᖓᓄᑦ ᐃᑎᓂᖓ, ᐊᔾᔨᒌᙱᑦᑑᑎᐅᓪᓗᓂ ᓇᑎᖓ ᒪᓕᒃᑐᒍ. ᓇᑎᖓ 4 ᐃᓯᒐᐃᑦ 11 ᐃᓐᓯᔅ (1.50 ᒦᑕ) ᓯᕕᑐᓂᖃᖅᑐᖅ, ᖁᓛᓂ ᓇᑎᖓ 6 ᐃᓯᒐᐃᑦ (1.8 ᒦᑕ) ᓯᕕᑐᓂᖃᖅᑐᖅ ᐱᔾᔪᑎᒋᓪᓗᒍ ᖁᒻᒧᐊᒃᑎᑕᐅᓯᒪᔪᑦ ᐃᒐᓛᖏᑦ. ᐊᒻᒪᓗᑦᑕᐅᖅ, ᑐᙵᕕᖓ ᑕᑭᓪᓕᒋᐊᖅᓯᒪᔪᖅ ᐱᓱᕝᕕᐅᑉ ᐊᑖᓂ ᓂᐅᕕᕐᕕᐅᑉ ᓵᖓᑕ ᓴᓂᐊᓂ. ᑕᒪᓐᓇ ᐊᔾᔨᒌᙱᓐᓂᐅᔪᖅ ᐊᑲᐅᙱᓕᐅᕈᑎᖃᓕᖅᑎᑦᑎᓯᒪᕗᖅ ᓯᑭᓂ ᐃᒡᓗᕐᔪᐊᕐᒥ ᐱᑦᔅᐴᒡ, ᐲᓐᓯᐅᓪᕙᐃᐊᒥ, ᓇᓕᐊᒃ ᓂᐅᕕᕐᕕᒃ ᐃᒡᓗ ᒥᑭᓐᓂᖅᓴᐅᖕᒪᖔᑦ, ᓯᑭᓂ ᐃᒡᓗᕐᔪᐊᖅ ᑕᐃᒪᐃᖏᓐᓇᖅᑐᒥᒃ ᐃᑎᓂᖃᕐᒪᑦ 5 ᐲᑦ 2 ᐃᓐᓯᔅ (1.57 ᒦᑕ). ᑕᐃᒪᐃᒃᑲᓗᐊᖅᑎᓪᓗᒍ, ᓵᒻ ᑭ ᐃᒡᓗ ᐃᓕᓴᕆᔭᐅᓯᒪᕗᖅ ᒋᓂᔅ ᓄᓇᕐᔪᐊᕐᒥ ᑎᑎᕋᖅᑕᐅᓯᒪᔪᓄᑦ ᒥᑭᓛᖑᓪᓗᓂ ᓂᐅᕐᕈᑎᖃᕐᕕᐅᔪᓐᓇᖅᑐᓂ ᐃᒡᓗᕐᔪᐊᖅ ᓄᓇᕐᔪᐊᕐᒥ ᐊᒻᒪ ᕆᑉᓕᐅᑉ ᐅᑉᐱᕆᓗᒍ ᐅᑉᐱᕆᙱᓪᓗᒍᓘᓐᓃᑦ! ᓄᓇᕐᔪᐊᕐᒥ ᓴᕕᕋᔭᐅᓂᖅᐹᖑᓪᓗᓂ ᐃᒡᓗᕐᔪᐊᖅ.
ᐃᒡᓗ ᓴᓇᔭᐅᓚᐅᖅᓯᒪᔪᖅ 1913-ᒥ, ᓵᓚᖃᕋᓱᐊᖅᑐᑎᒃ ᕚᓐᑰᕙᒥ ᓄᓇᓕᐸᐅᔭᒃᑯᑦ ᑲᑎᒪᔨᖏᑕ ᐃᓱᒪᓕᐅᕈᑎᒋᓚᐅᖅᑕᖓᓂᒃ ᑎᒍᓯᔪᒪᓪᓗᑎᒃ ᐊᑭᓕᖅᑕᐅᙱᓪᓗᑎᒃ ᓄᓇᒥᒃ ᐱᖁᑎᒋᔭᐅᔪᒥᒃ ᓄᓇᓕᖕᓂ ᓇᖕᒥᓂᖃᖅᑎᐅᔪᓄᑦ ᓵᖕ ᑐᐃᒧᑦ, ᖃᐅᔨᒪᔭᐅᖕᒥᔪᖅ "ᓵᒻ ᑭ". ᐃᓂᖃᖅᑐᖅ ᑳᕈᓪ ᓯᑐᕆᑦ ᐊᒻᒪ ᐲᓐᑐ ᓯᑐᕆᑦ ᓴᓂᕌᓂ, ᐃᑎᓂᖓ ᓄᓇᐅᑉ ᒥᑭᓪᓕᒋᐊᖅᑕᐅᓚᐅᖅᑐᖅ 30 ᐃᓯᒐᐃᑦ (9.1 ᒦᑕ) 6 ᐃᓯᒐᐃᑦ (1.8 ᒦᑕ) ᓯᕕᑐᓕᖅᑎᑕᐅᖁᓪᓗᒍ ᑭᖑᓪᓕᖅᐹᖅ. ᓵᖕ ᓇᒻᒥᓂᖁᑎᖃᑎᒥᓂᒃ ᓴᓇᔪᓐᓇᕐᓂᕋᖅᑐᓂ ᐃᓪᓗᒥᒃ ᓄᓇᒥ ᐊᒥᐊᒃᑯᒥ ᐊᒻᒪᓗ ᓵᒻ ᑭ ᐃᓪᓗ ᐱᔭᕇᖅᑕᐅᓚᐅᖅᑐᖅ ᐊᕐᕌᒍ ᐊᓂᒍᖅᑎᓪᓗᒍ. ᓯᕗᓪᓕᖅᐹᒥ ᓇᑎᖓᓂ ᐃᓪᓗᖃᓚᐅᖅᑐᖅ ᓂᐅᕕᕐᕕᓐᓂᒃ, ᖁᓛᓂ ᐃᓪᓗᖃᖅᑐᓂ ᐊᖏᕐᕋᕆᔭᐅᔪᓂᒃ ᐊᒻᒪᓗ ᑎᒥᐅᔪᓄᑦ ᐃᓪᓗᓂᒃ, ᐊᒻᒪᓗ ᐊᑖᓂ ᐃᓪᓗᖃᖅᑐᓂ ᑭᒃᑯᑐᐃᓐᓇᕐᓄᑦ ᐅᐊᓴᕐᕕᐅᔪᓂᒃ.
ᓄᓇᓕᖕᓂ ᓇᖕᒥᓂᖃᖅᑎᐅᔪᖅ ᔮᒃ ᓵ ᓂᐅᕕᓚᐅᖅᓯᒪᔪᖅ ᓵᒻ ᑭ ᐃᒡᓗᕐᔪᐊᖓᓂᒃ 1985-ᒥ ᐊᒻᒪᓗ ᓴᓇᔭᐅᒃᑲᓐᓂᓚᐅᖅᓯᒪᓪᓗᓂ ᐊᕐᕌᒍ ᑭᖑᓂᐊᒍᑦ. ᐃᒡᓗ ᑕᐃᒪᙵᓂᑦ ᐳᓚᕋᖅᑎᓄᑦ ᑕᑯᔭᐅᔪᒪᓕᖅᑐᖅ, ᓇᓪᓕᐅᒃᑯᒫᓕᕆᔨᒃᑯᑦ ᓱᓕ ᐊᐅᓚᓂᖃᕋᓗᐊᖅᑎᓪᓗᒋᑦ ᓇᑎᖓᓂ. ᐃᓱᒪᒋᔭᐅᔪᖅ ᐃᓕᖅᑯᓯᑐᖃᖅᑎᒍᑦ ᐃᑦᑕᕐᓂᓴᖃᕐᕕᐅᒋᐊᖓ ᓄᓇᓕᓐᓂ ᒐᕙᒪᒃᑯᓐᓄᑦ ᑎᑎᕋᖅᑕᐅᓯᒪᓪᓗᓂᓗ ᑲᓇᑕᒥ ᐱᑐᖃᐃᑦ ᑎᑎᕋᖅᑕᐅᓯᒪᕕᖏᓐᓂ.
ᑐᑭᓯᒋᐊᕐᕕᒃᓴᐃᑦ
[ᓱᖁᓯᖅᐹ | ᐊᓯᔾᔨᖅᑎᖅᐸᖕᒋᑦ ᓴᖅᑯᖅ]- Moliere, Ashley (May 25, 2021), "Built on a Bet: An inside Look at the World's Narrowest Building" (in English), CBC News, https://newsinteractives.cbc.ca/longform/sam-kee-building-legacy-chow-family/